ه‍.ش. ۱۳۸۹ اسفند ۶, جمعه

اوتوز- قيرخ ايلدن سونرا بانلاماق!...

محمد علي برزگر (گرگرلي آراز)
دوز قيرخ ايكي ايل اوستوندن كئچير؛ كيلاسدا،اوچ- اوچ، دؤرد- دؤرد اوتورارديق. ائله بيل دونن ايدي، اوچونجو سيرادادا بيز اوتورموشدوق.معلليميميز درسي دئييب، اؤز يئرينده اوتوروب، ائشييه باخيردي. بيزده سسسيز دن، گاه معلليمه، گاهدا پنجره دن ائشييه باخيرديق. قار ياغميشدي، هاميميز سئوينيرديك. چونكو گلن زنگ ورزيشيميز واريدي، و بيز قار گولـله سي اويناياجاغيديق. زنگ وورولدو. بير آز دينجه لندن سونرا هاميميز دؤزومسوزلوك ايله ورزيش معلليمين گؤزله ييرديك. او كيلاسا گيرديكده هاميميز آياغا قالخديق؛ اوتورون، دئدي. اوتوردوق. معلليم باشلادي: اوشاقلار، بويون ائشييه گئتمه يه جه ييك؛ و ائله كيلاسين ايچينده ورزيش ائده جه ييك! بو سؤزو ائشيده رك، هاميميزين قول- قاناديميز سيندي.
بير آز دئييب- گولمكدن سونرا دئدي: ايندي باشلاياق ورزيش ائتمه يه. هاميميز هويوخموشدوق! نئجه ورزيش؟
معلليم باشلادي:
اوشاقلار! سيز ايندي بير بير بانلاياجاقسيز! ياني خوروز سسي چيخارداجاقسيز! منده سيزين بانلاماغيزا گؤره، سيزه ورزيش نومره سي وئره جه يم! بللي دير كي هانسينيز ياخشي بانلاساز، ياخشي نومره آلاجاقسيز!
ائله حسين دن باشلاياق.
حسين! بانلا گؤروم؛ او بانلاماغا باشلادي، چونكو او بيرينجي بانلايانيدي؛ هاميميز، اونا گولدوك! معلليم اؤزوده گولدو!
معلليم دئدي: پيس بانلامادين؛ سن 15 آلارسان!
تقي ده، پيس بانلامادي؛ اودا 16 آلدي.
13 آلان، 10 آلان، 18 آلان دا واريدي! تويوقچو حسينين نوه لري هاميدان ياخشي بانلاديلار! اونلار 19 آلديلار.
نوبت مهدي يه يئتيشدي؛ مهدي بانلاماغي ائله اوزاتدي كي، هاميميز گيج قالميشديق!معلليم دئدي: ساغ اول مهدي! بودا 20! حاققيندي؛ گؤزل بانلادين!
منده 16 آلديم!
نوبت حبيبه يئتيشدي، هامي گؤزله ييردي كي او نئجه بانلاياجاق!
حبيب ها زور وئردي، بانلايا بيلمه دي! او يالنيز بير دورتمه ده مهدي يولداشيندان يئدي! اَده بانلا! بانلاماسان نومره يوخدو ها!
معلليم دئدي: حبيب! بانلا، بانلاماسان، ورزيشده تجديد اولاجاقسان!
او زاماندان دوز قيرخ ايكي ايل سوووشور. مهدي ده، منده، حبيب ده بير اداره ده يديك، سحر يئمك يئييرديك. حبيب بيردن قاييديب دئدي: بو تازا رئييس، اؤزون برك توتور! بللي دئييل هارانين نوباريدي؟ بيزي تاخيب شيشه، توتوب تنديره.
بيلميرم هانسي جاني يانميش بو سؤزو رئييسين قولاغينا چاتديرير!
او آي رئييس اونون آيليغيندان بير آز كسميشدي! حبيب نه ده نين سوروشماق اوچون، رئييسين ياناينا گئدير!
رئييس اونا بير جومله سؤز دئيير:
حبيب! ائله بيل اوتوز- قيرخ ايلدن سونرا بانلاماغي اؤيره نميسين؟!

هیچ نظری موجود نیست:

ارسال یک نظر