ه‍.ش. ۱۳۸۹ بهمن ۱۱, دوشنبه

بوگونکی بیر گونده انقلاب زمانی

اداره نی تعطیل ایلدیخ ، اوه تلفونونان دئدیمکی دوسلارومونان گلیریک تلوزیونا باخاق . چون من تازه بیر رنگیلی تلوریون آلموشدوم ،چون امامون گلماقین تلوزیون دئمیشدیکی مستقیم گؤرسه ده جک ، اؤناگؤره بیزه یغیشدیق . منیدیم ، حسنیدی ، علیئیدی (کرد) ، میرلاخانومودی (فیلیپینلی) ،و آبامونان بیرده باجوم .
هاموموز گؤزلریمیزی تیکمیشدیک تلوزیؤنون صفه سینه ، هئچکس دانوشموردی ، هاموموز اله بیر کی بیر عزیز و جیگرگوشه میز ایستیر گلسین ، دوغورداندا کی اؤجورودی . ایندیده کی بولاری یازورام ، خیال عاله مینده او زمانلارا پرواز ادیرم . اؤ غریب شهره ، اؤ مهربان آداملارا، کرد، فارس ، ترک ، حتی او فیلیپینیده نگرانودی .
بیرلحظه هواپیمانی گؤرسه دی ...... آمما تز کسیلدی  .... گینه ده بیر آزدان سورا برنامه باشلادی .... آز گؤرسه دنن سورا کسیلدی .
بولدوخکی ایمام طیاره ده ن یئنیبدی ، آما داهی گؤرسه  تمئدی . هاموموز هیسلندیک ، و فیکیرلشدیک کی آلله ایماما نؤاؤلدی  آزقالوردوک تلوزیونی آتاخ حیاطا . ( سورا ائشیدیک کی چوخلاری تلوزیونلارون سیندیرمیشدیلار) . هیجاننان اؤتورانمادوخ ، اداره یه قایودوخ ، اخباردا اشیدیخکی اما چوخ چتینیغینان بهشت زهرایا یتیشیب و اؤرادا دانوشوب و ........ 
بودا منیم خاطرم بهمنین اون ایکیمجی گونوندن
بوردادا فارسیجا 1386 ایلده یازموشام ایسته سه ز اؤخویون

دهه فجر و بیست و دوم بهمن ماه را تبریک میگویم

منیم مشق دفتریم

لاب دوزونی خبر آلساز من اوز دانوشدوغوم دیله ، یازماغی باشارمورام . اما اؤز اؤزومه فیکیرلشدیم ، بو وبلاگی کی چؤخدان ثبت اله میشدیم و بوش قالوردی ، بیردانا مشق دفتری کیمین یازوم ، باشارانلار ایراد ایشکاللارومی نظر قسمتینده یا ایمیل وسیله سیله منه یازاللار منده یواش یاواش یولا دوشرم . بوفیکیر رضا شاعیریمیزین ممدعلیه یازدوغی سوزلری اؤخویاندان سورا باشوما دوشدی . بوندان سورا اوز اوزاقدا قالان خاطره لریمی ( البته خاطره لزیمی بو ردا فارس دیلینده یازموشام ) . اولارکی هردن یادیما دوشور بورا یازاجاغام . ایراد ایشکالارومیدا سیز منه اؤرگه ده رسیز .آشاغادا چنگی شاعیریمیزین محمد علی یازدوغی سوزلری اضافه ادیرم . و ممدلی همشهریمیزه بؤیوک و قادر الله دان تزلیکده سالامتیک ایستئیرم . الله تزلیکینن شفاسون ورسین، آمین
محمد علي برزگر (گرگرلي آراز)      گرگرده دونيايا گوز آچيب، آتاسي ابراهيم برزگر، يازيچي اولماسادا، تاريخين آجي- شيرين اولايلاري ايله ياشاميش بير اينسان اولوب.
گرگرلي آراز خالق بيلييي اوزَريند، اؤزَلليكله آتا- بابا سؤزلَري، اوشاق ادبيياتي، ساتيريك يازيلار... قونوسوندا، چوخ گؤزَل و باجاريقلا چاليشيب. آما حاييفلار اولسون كي ايندييه دَك بيزييم خالق، اونون يازيلاري ايله تانيش اولماييب؛ و يا اونون ساتيريك ادبياتدا چوخ گوجلو قَلَمي وار و ائله اونا گوره دير كي قَلَمداشلارين چوخو اونا، مَممَد جليل قوليزاده نين ايتميش نَوه سي دئييرلَر.گرگرلي آرازين چوخ دَرين بير مَنلييي ، گَله جه يه اومودلو باخيشي و نورلو بير سيماسي وار. اونون اوره يي هر واخت گؤزَلليكلَردَن يانا چيرپير، و گئرچَكدَن، گوزللييي دويوب و سئون بير يازيچي دير. او توپلومسال ياشايشين اولايلارينين يانيندان هئچ واخت سايماز كئچمه يير و دوغروسو هر بير زادي دَريندن باشا دوشور.

ه‍.ش. ۱۳۸۹ بهمن ۱۰, یکشنبه

هانی اؤ آداملار

زینب خالا ، بیزیم کندیمیزده اللخصوص بیزیم محلله ده هامولاریمیزا تانوشودی بیر گون گؤر مسئدیخ  بیر زاد ایتیرمیش آدام کیمین اؤلاردیخ . منیم آبامداکی لاب بتر (رحمتلیک  آنامیزا ، آبا دیردیخ ، روسی کلمه دی ) . زینب خالا اوچ دنه اوشاقلارون سالاردی یانونا ، توتلار یتیشه نده توت یئماغا ،.. بیزیم اوه گه له ردی . قاپوموز همیشه آچوغودی، اولاردا اوز ائولری کیمین دئمه میش اله مه میش ،سه ره له نه ردیلر توتون دیبینه ، ال یتیشن پوتاخلاری سیلکه لییه ردیلر ،  اؤزی و اوشاقلاری باشلویاردیلار یماغا (خاطراتومی یازاندا بولمورم نیه رحمتلیک  رینب خالا یادومنان چیخیب ) . توت یییب دویاردولار ،اونان سورا توتوندیبینده قالانلاری بیر بیر ییغاردیلار و آپاراردیلار قوروداردیلار ، قیشدا یئیردیلر ، بولموسوز کی نئجه لذذتلی اولوردی او توتون قوروسی ،هردن بیرده بیزه وره ردی . زینب خالا بیر مخصوص لهجه ئینن تزتز دانوشاردی ، اوجابویلو و شیرین دیلی بیر خانومودی و بیز اونی چوخ ایستیردیخ ، اوزوموزه دوغوردان خالا بولریدیخ . هره میزی بیر دیلینن دانوشدوراردی .
 آبا مونان ساعاتلار اتوراردی و صحبت ادردیلر و بیزده اونون اوشاقلارویونان اؤینایاردیخ .
کچن گونلر کی یادوما دوشوللر ، اوز به اوزومه فیکیرله شیرم : بیزله ره نه اؤلدی؟ ، نه مه نه میز آزالوبدی ؟ پولوموز ؟ وار دولتیمیز ؟ یا .......؟
بولار کی هاموسی اؤزمانلار دان ، چوخ ، چوخ  اضافه له شیبدی . پس بیزه نه اتفاق دوشوبدی کی ایندی زینب خالا کی هئچ ، اناموزی ، باجوموزی ، قارداشوموزی ، یؤخون فامیلریمیزی ده هفته لر آیلار گؤرموروخ ؟
 شهریارومون حیر بابا شعری یادوما دوشور کی :
حیدر بابا شیطان بیزی آزدیریب
 محبتی اوره کلردن قازدیریب
قره گونون سرنوشتین یازدیریب
سالیب خلقی بیربیرینین جانونا
باریشیغی بلشدیریب قانونا
ایندیده کی او صاف اورکلی انسانلار یادوما دوشولر ، خیال عالمینده او گونلره پرواز ادیرم و اؤ آداملاری سینما پرده سی کیمین گوزومون قاباغوندان کچیدیرم .
ایندی نه اؤ آداملاردان خبر وار و نه ده او اولردن و نه ده اؤ صفا و صمیمییتدن .دنیا ایله باشوموزی قاتوبدیکی ، آدوموزدا یادوموزدان چیخبدی ، زندگانلوغوموزی گویموشوخ دنیا مالی ییغماغا ،
بیر سوروشون بو قارقونموش فلکدن
نه ایستیور بو قوردوغی کلکدن؟
دینه گئچیرت اولدوزلاری الکدن
قوی توکولسون بو یئر اوزی داغولسون
بو شیطانلیق قورقوسی بیر ییغیلسین .

ه‍.ش. ۱۳۸۹ بهمن ۹, شنبه

کیچیک قارداش - ادامه سی

چیین چیینه اوتوردولار. گئجه سویوقودی. خوان سیگاراسین یاندیردی. لاپ یورقونودو آما یاتا بیلمیردی.  حیسّ ائله دی قارداشی یورولوب اسنییر. بیرآزدان سونرا حرکتدن دوشدو. یاری یاریمچیلق یاواشجا نفس چکیردی. بیرآزدان میزیلتییا بنزر سسلر آغزیندان چیخیردی. خوان دا چالیشدی یاتسین. الیندن گلدیکجه اوزون داشین اوستونه سه ره له دی و بئینینی فیکیر خیالدان بوشادماغا چالیشدی. باشارا بیلمه دی. داها بیر سیگار یاندیردی. اوچ آی قاباق سورونون یانینا قئییدنده ایکی ایل اولاردی باجی قارداشینی گؤرمه میشدی. دیوید ائله همان او قاراشیدی کی اوشاقلیقدان اونا نیفرت و پرستش حیسیّ واریدی. آما لئونور عکسینه داها پنجره دن هوروکلی باشینی ائشیگه چیخاریب آوارا قیزیل ده ریلره داش آتان قیز دگیلدی. ایندی اوجا بویلو شسلی شباهتلی بیر آروادا دؤنموشدو کی گؤزه للیگی بدوی رفتارینان قاریشمیشدی و دؤوره‌سینده اولان طبیعت کیمی غریبه وحشیلیک وجودونو بوروموشدی. خوان باجیسین ذهنینده جانلاندیراندا گؤزلرینده نیفرت حیسّینی گؤروردی. او گون شافاق آتاندا کامیلیونو گؤردی کی آتلاری بسله مه ک اوچون چوبان دامینی په‌یه‌دن آییران تارلادان گئچیردی. شهله‌نمیشدی.
دیوید “ سس سیز صداسیز چیخاخ قیز اویانماسین “
بارماخلارینین اوجوندا چوبان دامینین پله لریندن آشاغی یئنیب و متروک جاده ده اکیلمیش یئرلرین کناریندان گئچنده، آزقالیردی کی بوغولسون. دییه سن کوردییرانین لاپ زیروه سینده دوروب. میغمیغالارین هجومونو و شهرلی لوت دهریسین ساشماغیدا حیسّ ائله میردی. داغدان یوخاری چیخدیخجا خفه لیک حیسّی ده آزالماقا باشلادی. یاخشی آت مینن دگبلدی. بیربیرینه قاریشمیش اوچوروم ایلانا بنزر بوروخ بوروخ داریشلیق بیر یولدا خطرلی هوس کیمی اونو کامینا چکیردی. هر سئیی دیقتله ایزلییردی. آتین یئریشین و آددیم آتماسین. باش آغریسیدا کئت به کئت آرتیردی.
- باخ!
خوان تکان یئدی و “ منی قورخوددن دئدی “ ... دئدیم بلکه یاتیبسان.
دیويد “ اودی با . کورموسن؟ “ دئدی.
بیرآن اود اودی گوده ن قارا قورخموش اوزی ایشیقلاتدی.
خوان اوزون دالا چکیب “ ایندی نئینی یه خ ؟ “ دئییب سوردو.
دیوید آما داها یانیندا دگیلدی : او بیر آن گورونن اوزون یئرینه ساری قاچیردی.
خوان گؤزلرین یومدی. قیزیل ده ریلی اللرین اودا ساری اوزاردمیش چومبه لن اوتورموشدو . گؤزلرین اودا زیلله میشدی سانکی اونی اودون شعله سینده گؤروردی. بیرده ن بیره بیر شئی باشینین اوستوندن آتیلدی. آتیلانی جاناوار سایدی اولّده آما ایکی ال بوینونون دووره سینه قیفیللاناندا نه باش ویرمه نی آنلادی. بیرده ن بیره و خبرسیز دعوادان حدسیز قوروخو جانینی یاخدی. ساواشدان قاچماق ایسته مه دی . تکجه بیر توسپاغا کیمی باشین قینینا چکیب اؤزون ییغدی  تا صدمه گؤرمه سین . باشاردیقجا کؤزلرین آچمیشدی قارانلیقدا اوستونه یومولانی تانیسین. ائله اوندا سسیندن تانیدی: “ اسگیک نه ایش گؤردون؟ “ “ ایتین بالاسی نه ایش گؤردون” خوان دیویدین سسین ائشیددی و تزه آنلادی کی ائله اویویدی قیزیل ده ریلییه تپیک ویریردی. گاهدا نظره کلیردی کی تپیک لری داشا دگیردی و همین بو مسئله اؤنی لاپ بتر حیرصلندیریردی. اولجه خوان یاواشدان خریلتی سسی ائشیدیردی. دییه سن قیزیل ده ریلی خیریلدیردی. سونرا تکجه دیویدین حیرصلی سویوشلرین ائشیدیردی. خوان بیرده ن بیره تاپانچانی الینده گؤردی و یاواش یاواش ماشاسینا فشار وئردی. حئیرتینن دوشوندی اگر اتش آچسا قارداشیندا اولدوره بیلر . سیلاحدان قورخموردی. اودا ساری گئتدیکجه عجیب آرامیش حیسّی واری یدی.
چیغیردی:
- دیوید بسدی. بیر گولله ویر خلاص ائله. داها ایشکنجه وئرمه!
جواب وئره ن اولمادی. ایندی خوان اونلاری گؤرموردی. اونلار اود ایشیقلاندیران منطقه دن خارج اولموشدولار. گؤرموردی. آما هرده ن یوموروق و یاخود سویوش سسی قولاقینا ده گیردی.
چیغیردی:
- دیوید گل منه ساری. کلمه سن آتش آچیرام.
بیر نئچه ثانیه دن سونرا برک حیرصله نمیش چیغیردی:
- دیوید اؤتور! اینان آتش آچیرام.
یئنه ده جاواب وئره ن یوخودی.
اول گولـله آچیلاندان سونرا خوان یئرینده دؤندی. سونراسی آما آتشی کسمه دن منطقه نی گولله یه باسدی. تکجه خشابین بوشالماسی اونی دایاندیردی. حرکته قادر دگیلدی. ایراده سیز اولاراق تاپانچا الیندن ایاقلاری اوستونه دوشدی.شلاله نین سسی  محو اولموشدی. جانینی تیتره تمه توتدی. ترین ایچینده بوغولوردی. بیرده ن اوجادان قیشقیردی:
- دیوید!...
لاپ یانیندا قورخموش حیرصلی سس « بوردایام ائششک! دئییرسن بلکه منی ده گولله لیه بیلرسن؟ دلی اولوبسان؟»
لئونور ایتلرین هورومه سیندن بیلدی اونلار قاییدیبلار. لند لندینین یوغون سسی گئجه نین سکوت جامینی پنجره نین آلتیندا سیندیردی و اونون مورگوسون پؤزدی.  اوبیر یاندان اسپوکی نین سسی قورخموش  جاناوارین له لهینه  بنزیردی کی هرده ن سوموک سیزیلدادان اولاماسی اوجالیردی. ائله بوآرادا بویلی دورمیتانین هورومه سیده اوبیرسیلره قاریشدی. هاننان گئژده ن ایتلرین قورخودان هورومه سی ، تانیشا قویروق بولویوب میریلدامایا چؤندی. ایتلر همیشه بئله میریلداماینان دیویدین قاباقینا قاچاردیلار. قاپینین جیریغیندان قارداشلارینین ائوه یاخینلاشماسین گؤردیو سونرا بویوک قاپینین آچیلیب باغلانماسین ائشیددی. منتظر قالدی پله لرده ن یوخاری چیخیب ائوه گیره لر. قاپی اچیلارکن خوان الین اونا ساری اوزاتدی.
دیوید « سلام خیرداجا قیز»  دئدی.
باجیسی اؤنی قوجاقلادی. اوزون قاباقا آپاردی اؤپسون آما اؤزی اؤپمه دی. خوان چیراغی یاندیردی.
-  نیه منه خبر وئرمدیز؟ گرک منه دییه ردیز. ایستیردیم قاباقین آلیم آما کامیلیا قویموردی. گرک اونودا ادب ائلیه سیز. دیوید...گورهیدین نئجه اؤزون منه یاپیشدیریدی. وحشی بیشرف! یالواریردیم منی اؤتورسون ...آما وئجینه ده گلمیردی!
-         
او هیزلی دانیشماغا باشلامیشدی آما بیرده ن بیره سسی باتدی. زولفلری پریشان آیاقلاری یالینیدی. دیوید و خوان ساکتلشدیرمه گه چالیشیردیلار. توکلرین تومارلیردیلار. شوخلوق ائلیردیلر و « بالاجا قیز» دئییردیلر...
دیوید « ایستمه دیک سنی ناراحات ائلییه ک! بیرده قالدی کی لاپ آخیردا گئتمه ک قرارینا گه لدیک. سنده کی یاتمیشدین او زامان » دئدی ایضاح اوچون.
- مخلص نه اولدی؟
خوان پتونو گوتدی و باجیسین اؤتدی. لئونور آغلاماقدان ال چکمیشدی. رنگی پوزگون، آغزی یاریمچلیق آچیق و باخیشی نیگرانیدی.
دیوید « هئچ زاد. هئچ بیر شیء اولملدی. تاپا بیلمه دیک» دئدی.
لئونورون اوزوندن نیگرانچیلیق سیلیندی و دوداقلارینا راحاتلیق حالتی اؤتدی.
دیوید « آما هر حالدا تاپاجاییق » دئدی و بئخیاللیقلا لئونورا ایستراحت ائتمه نی تکلیف ائله دی. سونرا قاییتدی. لئونور « بیر آن دورون ، گئتمه یین » دئدی.
خوان یئریذده ن ترپنمه میشدی.
دیوید « هه نه اولوب منیم بالاجا قیزیم » دییه سوردی.
- داها دالیجا گئتمه یین.
دیوید « نیگران قالما. داها اونود. بو کیشی ایشیدی. بیزه تاپشیر» دئدی.
لئونور گینه ده آغلاماغا باشلادی ، بو دفعه قورخو و تیتیره تمه ینن. ایکی الینن باشینی توتدی. دییه سن برق توتوبدی. چیغیریلتیسی ایتلری اویاتدی. پنجره ننین آلتیندا ایتلر هورومه یه باشلادیلار. دیوید  تعجبله خوانا ساری دؤندی . دییه سن بیر شیء سوروشماق ایستیردی. کیچیک قارداش آما ساکت دورموشدی.
دیوید « داها یاخشی بالاجابالا آغلاما. دالیسیجا گئتمه ریک» دئدی.
- یالان دئییرسن من سنی یاخشی تانیرام. سن اونی اؤلدوره جکسن.
دیوید « داها اوننان ایشیمیز یوخدی .. نیه بئله فیکیرلشیسن او بدبختی تنبیه ائله مه ک لازیم دگیل؟ » دئدی و سوروشدو.
لئونور ته له سیک دیل دوداقین دیشلییه ره ک « اؤ منه هئچ نه ائتمه دی» دئدی.
دیوید تاکیدله « داها بو باره ده فیکیرلشمه. بیزده اونودوروق. داها ساکیت اؤل بالاجا قیز » دئدی.
لئونور هه له آغلییردی. آویدلاری و دوداقلاری یاش اؤلموشدی. پتو یئره دوشموشدی. تکرارلادی:
- اومنه هئچ زاد ائله مه دی. هامیسین یالان دئدیم.
دیوید « بیلیرسن نه دئییرسن؟ » دییه سؤردی.
- داها بیربئله دالیمجا گلمه سین دؤزه بیلمیردیم --- لئونور منّا من ائلیردی--- سحرده ن آخشاما کولگه کیمین دالیمجایدی.
دیوید « گؤرورسن گوناه منیم کی یدی. اونا من دئمیشدیم سنی گودسون. تک بیر آروادین چولده گئدیب گلمه سی تهلوکه لییدی. منده اونا امر ائله دیم سنی قؤروسون. گرک قیزیل ده ریلییه اعتماد ائله مییه یدیم. هامیسی بیر بیرینین تاییدی...» دئدی.
لئونور زاریلدادی:
- منه هئچ بیر ایش یاپپادی. اینانین دوزون دئگیرم. کامیلیودان سؤروشون. اؤ بیلیر هئچ بیر شیء باش وئرمییییب. ائله اونا گؤره اؤنی قاچیرددیم. اینانمیسان؟ هه اؤ گئدیب. من اؤزوم اؤنا دئدیم گئدسین. تکجه ایستیردیم الیندن خلاص اؤلام. ائله اؤنا گؤره ده بو یالانی قؤشدوم. کامیلیو هرزادی بیلیر. اوندان سؤروش.
خوان قاییدیب قاپیا ساری گئدیردی. ائله کی دیوید ایسته دی قاباقین آلسین اؤزوندن چیخدی. ائله بیل جنّی اولموشدی. یامان دئمه گه باشلادی: باجیسینا جندا دئدی. قارداشینا آلچاق ! دئویدین دؤشوندن یوموراقینان ویردی و یولونون اوستوندن کناره آتدی. آددیم لارین گئن آتا آتا ائودن چیخدی دالیسیجا یامان یوغوزدان بیر ایز قالاراق. لئونورونان  دیوید خوانین تارلایا گیرمه سین، سونرا اورادان چیخماسین و کلورادونون بوینونون ایپکلی یالینی توتوب آتین بئلینه سیچراماسین گؤردولر. لئونورون تنبل آتینین آوساری  نابلد اله دوشموشدی و آتیلیب دوشمه ینن مینیجی گؤستره ن یولی چاپیردی.  گؤروردولر
لئونور« اولمایا اؤنی گولله له یه؟» دئدی و سؤردی.
دیوید لئونورا دایانیب « امین اؤل. بیر ایش یاپماز» دئدی.
قیزیل ده ریلیلرین هامیسی کولوخلاردان چیخیب، کیچیک قارداشین آت اوینادماسینا حیرانلیقلا باخیردیلار. خوان هرده ن حیرصلی دابانلارین آتین قارنینا و یوموراقین اونون باشینا ویریردی. کلورادو خوانین ضربه لری آلتیندا اؤیان بویانا فیرلانیب ، آتیلیب دوشوردی. دیوید ایله لئونورا خوانی آت اوستونده تاماشا ائلیردیلرکی کلورادو آیاقدان دوشموش حالدا دوردی و یورقون نفس چه که چه که باشین آشاغی سالدی. خوان ائوه ساری دؤندی .قاپینین قاباقیندا دییه سن یادینا بیر شیء دوشدی. قاییدی. آتی چاپدیراراق " لاموگره " کولوغونا ساری گئتدی. آتدان یئره آتیلیب و تپیکینن باغلی قاپینی آچدی. ایچه ریده کی قیزیل ده ریریله ره دئدی کی تنبیه لری باشا چاتیب. سونرا آهسته ائوه ساری قاییدی. قاپینین قاباقیندا دیوید انتظار چکیردی. خوان ترده بوغولموش آما چوج جدی گؤستریردی. دیوید اونا یاخینلاشدی. قولون چیگنینه سالیب « گئداخ. لئونور دیزلرین آغریسین آلینجا بیزده باده لریمیزی ایچک» دییه ره ک ایچه رییه آپاردی.

كيچيك قارداش

ماريو وارگاس يوسا
ترجومه: شهریار گلوانی
یولون کناریندا بویوک بیر قایا. قایانین اوستونده شیشمان قورباغا. دیوید دیقتله نیشان آلدی. خوان “ ویرما” دئدی.
دیوید تعجبله قارداشینا باخیب سیلاحینی اندیردی. خوان “ گولـله­نین سسین ائشیده‌ر “ دئدی و سوردو.
- دلی اولوبسان. اللی کیلومتر شلاله‌ده‌ن اوزاقیق.
خوان” اولابیلیر شلاله ده اولماسین. آما مغارالاردا کی وار” دئدی و اکله‌دی.
دیوید” یوخ. اما اولسادا حتا، گومان ائتمز بیز اولاق” دئدی.
قورباغا گئن آغزینان هله اوردایدی، نفس چکیردی و توربالانمیش گؤزلرینن بیلدی بیلدی دیویدی وراندازلییردی. دیوید بیرده تعلل له تاپانچانی نیشان توتدی و آتش آچدی!


خوان “ ویراممادین” دئدی.
-  یوخ هی ویردیم.
داشین کنارینا گئتدیلر. قورباغا اولان یئری بالاجا گؤی لکه باتیرمیشدی.
- ویراممامیسان!
خوان “ یوخ یوخ هی ویرمیشام!” دئدی.
آتلارا ساری گئتدیلر. اونلارینان آددیم آددیم اسن کولک هله ده اسیردی، آما اطرافدا اولان منظره عوضلشیردی: گون تپه لرین دالیندا باتیردی، داغین اتگینده غریبه بیر کولگه تارلالارین اوستونه سه ره لنمیشدی، اوزاقداکی زیروه له رین اوستونده کومالانمیش بولودلار قایانیل زیل تورپاقی رنگینه دونموشدولر. دیوید آلتینا سالان زیراندازی چیگینلرینه چکیب، سونرا غیرارادی اولاراق سیلاحینداکی بوش گولله نین ئیرین دولدوردی. خوان اوغرونجا دیویدین اللرین سیلاحی دولدوروب قینینا قویاندا ایزلیییردی. اونادا ائله گه لدی کی دیویدین بارماقلارینا بئینی فرمان وئرمیر.
دیوید” ادامه وئره ک؟ “ سوردو.
خوان باشین قبول نیشانه سینه آشاغی ایدی.
اؤنلرینده کی یول باشی یوکوش دار بیر یولیدی. حیوانلار چتینلیکله کئچن گونلرین یاغیشیندان هله یاش اولان داشلارین اوستوندن زووه زووه اؤزلرین یوخاری چکیردیلر. قارداشلار لال کار یوللارینا دوام ائدیردیلر.آغیز بورونلاریندان ملایم بخار چیخیب ، اوزلرینه ده ییب و سونرا محو اؤلوردی. داها هاوا قارانلیق اولموشدی. آنجاق اوزاقدان گئجه قوشو کیمی گئنیش بؤلوش سه ره لنمیش و خلق آراسیندا گؤزلر تپه سینه آدلانان تپه و ماغارالاری ، سئچه بیلدیلر...
خوان” ایستیرسن گؤز دوله ندیرک بلکه بورالاردا اولدو؟” دئدی و سوروشدو.
-  زحمتینه ده یمز. امینم شلاله ده ن ترپنمییب. یاخشی بیلیر کی گؤرونه بیلر.همیشه یولدان گئچن اولور.
خوان “ اؤزون بیلرسن. نئجه کئفیندی” دئدی و بیر آز سورادان “ بلکه ائله بئله یالان دئییب” سوروشدو.
- کیم؟
-  او کی بیزه دئدی اؤنو گؤروب.
- لئوندریا؟ یوخ جانیم. اوندا منه یالان دئمه یه جسارت یوخدی. دئدی شلالهین آلتیندا گیزلنیب . امینم کی ایندی ده اوردادی. گؤره جکسن.
یوللارینا گئجه اولاناجان دوام وئردیلر. قارانلیق کؤینگی اونلاری بورودی. آدامسیز آغاجسیز بوراخیلمیش طبیعت اؤز غریبلیگینده ساکیتجه سوسموشدی. خوان بوینونو آتین بوینوندان دا آشاغی ساللامیشدی و یئرده اولان آیاق ایزلرین گودوردی. بیردهن بیره دوز یئره آیاق قویاندا بیلدی کی داغین زیروه سینه چاتیبلار. دیوید یولا دوام ائتمه له رینه ایشاره ائله دی. آتدان دوشدولر.حیوانلاری قایایا باغلادیلار.بویوک قارداش آتین یالینی چکدی و نئچه یول آتین بئلینی تومارلادیو دیل دوداق آراسیندا “ ساباح گورمییه م دونوبسان؟! “ دئدی.
خوان “ ائله ایندی آشاغی یئنیریک؟ “ دئییب سوروشدی.
دیوید “ هه ائله ایندی یئنیریک. یاخشیسی بودو گونوزو دره ده گؤزلییه ک. ائله اوردادا دینجه له ریک. قارانلیقدا یئنمه کدن قورخوسان؟ “ دئییب سوروشدو.
- یوخ. ایسترسن یئنه ریک.
ادامه سی گلن پستودا
حکایه

ه‍.ش. ۱۳۸۹ بهمن ۸, جمعه

آیه مبارکه

وجعلنا،خط،خوشنویسی،قرآنی،قرآن،نستعلیق،شكستهفاثر،هنر،خوش قلم،انجمن خوشنویسان،خوشنویسی،هنرمند

نجف عمي نين گوللو توماني!!

قيرخ گونه ياخيندير كي حؤرمتلي يازيچيميز مممد علي برزگر( گرگرلي آراز) آغير بير خسته ليييه دوچار اولوب. اونون حؤرمتينه گؤره بير آز بيوگرافيسيندان و بير دانا ساتيريك يازيسين تقديم ائديريك:
*****
بير گون دميرچي دوستومون يانينا گئتميشديم، دميرچي دوستوم اؤز خاطيره لرين گوزلجه سؤيله ين بير آداميدير. او منه چوخ سؤزلر دئميشدي، آما بير خاطيره سي هئچ واخت ياديمدان چيخماز. دميرچي ياديما دوشنده اونون خاطيره سيده ياديما دوشر.


نجف عمي نين گوللوتوماني!!
اونون خاطيره سي بئله يدي:

بوتون كندلرده، ياز باشلاناندا بو ايش بير عادته دؤنوب. زميلري سووارماق واختي اولاندا، كند اهلي بؤلوشوب، چئشمه دن زميلره دك آرخلاري آريديب، تميزله يرلر. يئددينجي گونودور. نؤوبه بيزيم كوچه نينيدي. دوققوز نفريديك؛ ايكي يوز مئتير ائل آرخيندان آرديدلاييب، تميزله يه جه يديك. منده آتامين يئرينه گئتميشديم؛و نجف عمي ايله ايشله ييرديم.نجف عمي يئتميش ياشيندا، آريق، جيلاز، بوغلو- ساققاللي،آز دانيشان وبرك ايشله ين بير كيشييدي. عادلريندن بيري بو ايدي كي، ايش باشينا يئتيشنده هميشه پنجه يين، شالوارين، كؤينه يين اَينيندن چيخارديب؛ تميز بوكوب؛ بير آغاجين هاچاسينا قويوب؛ سونرا زير  شالوارين اَتكلرين جورابلارينين آلتيندا بوغوب؛ اَللرينه توپوروب؛ بسم الله دئييب؛ باخيب يولداشينين اوزونه؛ ايشه باشلاياردي.
او گون من چوخ يورغون ايديم. نجف عمي مني بير يومشاق يئره سالميشدي. اؤز حاليمدا ايشله ييرديم؛ هاوا ياواش- ياواش ايشيقلانيردي. گونش داغين بؤيروندن بير بالاجا اؤزونو نيشان وئردي. منيم قيريشيغيم آچيلدي. آياغيمي بئلين لاپاققاسيندان گوتوروب؛ اويان- بويانا باخديم. هامي ايشله ييردي. دالي دونوب؛ نجف عمي يه باخديم؛ او همي اؤزونه اوخويوردو؛ هميده اَلي- آياغي ايكي منجه چاليشيردي. آما نجف عميده بير شئي گؤردوم كي، منه چوخ گولمه لييدي. گؤزلريم كلله مه چيخدي. ائله بيل قميش كيمي قوروموش جانيم قاشينيردي. گوله- گوله  نجف عمي ني ايشدن دايانديرديم. او مندن سورشدو: هه دميرچي نه اولوب؟ نه گؤرموسن؟ اوزون بارماغيم ايله اونون اؤزونه اشاره ائله ديم. اوست- باشينا باخاندا، بيلدي كي؛ ايشه گلنده اؤز تومانينين يئرينه، آروادي خججه نين تومانين گئييب! اودا نه تومان! پاچاسي گئن، قيرميزي چيت، بوتون گوللر و رنگلر اونون اوستونده واريدي. بيرده كي سول قيچينين اوستونده آيري رنگده بير جيب واريدي، زيپي چكيلميشدي. يازيق نجف عمي! بئلي بوراخيب؛ يوموشوب؛ اوتوردو يئره. اويان- بويانا باخيب؛ دئدي: ياناسان خججه، ياناسان سني!  
اشاره ايله منه دوشوندوردو كي، پالتارلاريمي گتير. گتيرديم. ائله اوتوردوغو يئرده، گؤج ايله اونلاري اَينينه تاخيب؛ دوردو آياغا.
دئدي: دميرچي!
دئديم: هن نجف عمي!
دئدي:دميرچي! سن نه گوردون؟
«سن نه گؤردونو» دئيه- دئيه؛ گؤزلري بير يانا اَييليب؛ بير اَلي وورماق اوچون گؤيه گئتدي.نجف عمي نين گؤزلري بير طرفه دؤننده؛ كند اهلي، اؤزلليكله خججه خالا ياخشي بيلردي كي؛ او ايتي له شيب. بير شئيي آدامين باشيندا سينماليدير.
بو سؤزلري دئيه- دئيه بوينوم كئچميشدي اونون اَلينه. بير آز بارماقلارين آچدي، نفس يئريم آچيلدي.
دئديم:هئچ زاد گؤرمه ديم.
بيرده سوروشدو، دئديم:نجف عمي گئتدييين مقدس مشهده آند اولسون؛ من، خججه خالانين تومانين سنين اَينينده گورمه ديم!
برك آند ايچمه ييمه گؤره؛ منله ايشي اولمادي. آما ايندي دك بئش- آلتي سئري نجف عمي دن كؤتك يئميشم. بيردن اوز به اوز چيخاندا؛ يولداشيم اونا باخيب گولنده، نجف عمي اونون گولمه سين مندن گورووب، مني بير ديرناقدان گئچيدردي.
آما بونو دئييم سيزه:
هامينين بير گوللو توماني اولوب؛ اودا شانسينا قاليب؛ چيخا ائشييه؛ يا، قالا ايچريده.
يازيق نجف عمي! دميرچي اونون گوللو تومانين، اؤز كندي هله هئچ؛ قونشو كندلره ده تعريف ائديب.
بعضيلري گوللو تومانين سؤزون اوردا- بوردا و بعضيلري قوخمادان، گوللو تومانين سؤزون طرفين اؤز يانيندا تعريف ائله ييرلر.
آما من بو كربلايي معصوما مات قالميشام!!!

چونكو او او هميشه ائشييه چيخاندا؛ گوللو تومانين اؤز شالوارينين اوستونه چكيب، چيخير ايشييه!!!
نویسنده : برزگر